Ուկրաինացի փախստականների միայն մեկ երրորդը պատերազմից հետո կվերադառնա երկիր, ընդ որում՝ միգրացիան երկրից կշարունակվի պատերազմից հետո, կարծում է ուկրաինական Տնտեսական ռազմավարությունների կենտրոնը (ՏՌԿ)։
Կենտրոնի վերլուծաբանների հաշվարկներով՝ 2024թ. հունվարի վերջի դրությամբ 5 մլն ուկրաինացի փախստականներից մտադիր է վերադառնալ մարտական գոտիներից տեղափոխվածների 13,8 տոկոսը, 45,1 տոկոս քաղաքացիները, որոնք սեփական միջոցներով ապրում են արտասահմանում եւ ուկրաինացիների 16,5 տոկոսը, որոնք այժմ ինտեգրվում են այլ երկրում։
Տղամարդկանց ելքի արգելքի չեղարկումից հետո կարող են արտասահման մեկնել մոտ 150 հազար ուկրաինացիներ, կանխատեսում է ՏՌԿ-ն։
ՏՌԿ-ի տվյալներով՝ 2024թ. հունվարի դրությամբ ուկրաինացի փախստականների ամենամեծ խումբը գտնվում է Գերմանիայում (30 տոկոս) եւ Լեհաստանում (22 տոկոս)։ Եվրամիությունից դուրս մեծ թվով ուկրաինացի փախստականներ պատերազմից հետո կան ԱՄՆ-ում (280 հազար մարդ), Մեծ Բրիտանիայում (253,2 հազար) եւ Կանադայում (210,2 հազար)։
«Մեր հաշվարկներով՝ Ուկրաինայի սահմաններից դուրս ըստ տարբեր սցենարների կարող են մնալ 1,4-2,3 մլն ուկրաինացիներ»,- իր կայքում տեղեկացրել է ՏՌԿ-ն։
Ուկրաինացի փախստականների կարգավիճակը, ըստ ՏՌԿ-ի, Եվրոպայի երկրներում եւ նրա սահմաններից դուրս փոխվում է. շատ երկրներ աստիճանաբար կրճատում են փախստականների վրա կատարվող ծախսերը եւ նրանց համար պայմանները դարձնում ավելի կոշտ, քան լիածավալ ներխուժման սկզբում։