Մեքսիկայի իրավապահ մարմինների առնվազն 26 աշխատակից տուժել է Մեխիկոյում նախագահական պալատի վրա ցուցարարների գրոհի հետեւանքով։ Այս մասին նշվել է Մեքսիկայի մայրաքաղաքի հանրային անվտանգության քարտուղարության հայտարարությունում։
«Մեխիկոյի Սոկալո հրապարակում ծավալված բողոքի ակցիայի ժամանակ ճայթռուկների բեկորներից վիրավորվել են մայրաքաղաքի ոստիկանության, հանրային անվտանգության քարտուղարության օպերատիվ խմբի եւ «Աթենք» ջոկատի աշխատակիցները։ Տեղում բժիշկները օգնություն են ցուցաբերել 26 զինծառայողի, որոնք հիմնականում վերջույթների վերքեր էին ստացել։ Նրանք բոլորը տեղափոխվել են տարբեր հիվանդանոցներ՝ մասնագիտացված բուժօգնություն ստանալու համար»,- տեղեկացրել են գերատեսչությունում եւ ավելացրել, որ գրոհից հետո ցուցարարները հեռացել են դեպքի վայրից։