Իսրայելցիների կեսից ավելին կարծում է, որ վարչապետ Բենիամին Նեթանյահուն պետք է անհապաղ հրաժարական տա՝ Գազայի հատվածի իրավիճակի համատեքստում։ Հարցման այսպիսի տվյալներ է հրապարակել Իսրայելի հեռուստատեսության 12-րդ ալիքը։
Հետազոտության արդյունքների համաձայն՝ կառավարության ղեկավարի անհապաղ հրաժարականին կողմ է եղել հարցվողների 58 տոկոսը։ 2022թ. ընտրություններում կառավարող կոալիցիայի մեջ մտնող կուսակցությունների օգտին քվեարկածների շարքում ներկա վարչապետի հրաժարականի գաղափարը պաշտպանել է հարցվողների 28 տոկոսը։ Հարցվողների 54 տոկոսը անհրաժեշտ է համարում երկրում արտահերթ ընտրությունների անցկացումը։
Բացի այդ, հարցման մասնակիցների 48 տոկոսը պաշտպանել է պաշտպանության նախարար Յոավ Գալանտի անհապաղ հրաժարականի գաղափարը, հարցվողների 50 տոկոսը կողմ է եղել Իսրայելի բանակի գլխավոր շտաբի պետի ազատմանը, 56 տոկոսը՝ Ընդհանուր անվտանգության ծառայության (հակահետախուզության) ղեկավար Ռոնեն Բարի հրաժարականին։
Ինչպես նշել է 12-րդ հեռուստաալիքը, հարցումն իրականացվել է ապրիլի 30-ին, օնլայն եւ հեռախոսով, ռեպրեզենտատիվ ընտրանքով, մասնակցել է 500 հարցվող։
