Կրթության, գիտության, մշակույթի և սպորտի նախարարության և «ԱՄԻՕ բանկ» փակ բաժնետիրական ընկերության միջև կնքվել է փոխըմբռնման հուշագիր ՀՀ բարձրագույն ուսումնական հաստատությունների ուսանողներին կրթաթոշակ տրամադրելու վերաբերյալ:
ԿԳՄՍՆ-ից NEWS.am-ին հայտնում են, որ ԿԳՄՍ նախարարության կողմից հուշագիրը ստորագրել է նախարարի տեղակալ Արթուր Մարտիրոսյանը, իսկ ԱՄԻՕ բանկի կողմից՝ լիազոր ներկայացուցիչ, բանկի Կորպորատիվ կենտրոնի տնօրեն Ազամատ Խակույը:
Արթուր Մարտիրոսյանը Հայաստանում կրթական բարեփոխումների ակտիվ փուլում կարևորել է համագործակցությունը նաև մասնավորի հետ՝ նշելով, որ ստորագրված հուշագիրը ՀՀ պետական քաղաքականության համատեքստում է. «Կրթությունը և մարդկային կապիտալի զարգացումը պետության առաջընթացի առաջնային գործոններ են, և շատ կարևոր է, որ մասնավոր հատվածը ևս ներդրում է կատարում այս ոլորտում՝ համահունչ պետական քաղաքականությանը: Հույս ունենք՝ ձեր օրինակը կլինի վարակիչ այլ տնտեսվարողների համար ևս»:
ԱՄԻՕ բանկի ներկայացուցիչը շնորհակալություն է հայտնել համագործակցության համար և ընդգծել, որ սա փոքր քայլ է՝ ընդլայնելու և զարգացնելու համագործակցային հետագա քայլերը: «Սա ներդրում է հանուն ապագայի, որի տերն այսօրվա ուսանողներն են»,- ասել է Ազամատ Խակույը:
Հուշագրի շրջանակում ՀՀ տարբեր բուհերի սոցիալապես խոցելի խմբերի բարձր առաջադիմությամբ մինչև 25 ուսանողների կտրվի կրթաթոշակ: Նպատակն է մարդկային կապիտալի զարգացումը, կրթական ծառայությունների մատչելիության ու հասանելիության բարձրացումը, սոցիալապես անապահով խմբերի բարձր առաջադիմությամբ ուսանողների խրախուսումը և այլն: Կրթաթոշակ տրամադրելու նպատակով կհայտարարվի ուսանողների ընտրության մրցույթ: Կրթաթոշակի արժանացած ուսանողների համար կստեղծվի ԱՄԻՕ բանկում աշխատելու հնարավորություն՝ ամրապնդելով կրթություն-աշխատաշուկա կապը՝ պետություն–մասնավոր հատված համագործակցությամբ:
